ബെംഗളൂരു: കേന്ദ്ര സർക്കാരിന്റെ ‘നിർഭയ പദ്ധതി’ പ്രകാരം നിർബന്ധമാക്കിയ ജിപിഎസും പാനിക് ബട്ടണും ഘടിപ്പിക്കുന്നത് ഒഴിവാക്കാൻ കർണാടകയിലെ വാണിജ്യ വാഹന ഉടമകൾ അയൽ സംസ്ഥാനമായ ആന്ധ്രാപ്രദേശിലേക്ക് കടക്കുന്നു. വാഹനങ്ങളുടെ ഫിറ്റ്നസ് സർട്ടിഫിക്കറ്റ് (എഫ്‌സി) നേടുന്നതിന് ആന്ധ്രയിലെ ആർടിഒ ഓഫീസുകളെ ആശ്രയിക്കുന്ന ഈ നിയമവിരുദ്ധ പ്രവർത്തനം കർണാടക ഗതാഗത വകുപ്പിന് വലിയ തലവേദനയായി മാറിയിരിക്കുകയാണ്. അടിയന്തര സാഹചര്യത്തിൽ സ്ത്രീകൾ ഉൾപ്പെടെയുള്ള യാത്രക്കാരുടെയും ഡ്രൈവർമാരുടെയും സുരക്ഷ ഉറപ്പാക്കാനും വാഹനങ്ങളുടെ സ്ഥാനം തത്സമയം ട്രാക്ക് ചെയ്യാനുമാണ് നിയമം കർശനമാക്കിയത്. എന്നാൽ അതിർത്തി കടന്നുള്ള എഫ്‌സി വിതരണം ഉടൻ അവസാനിപ്പിക്കണമെന്ന് അഭ്യർത്ഥിച്ച് കർണാടക ഗതാഗത വകുപ്പ് ആന്ധ്രാപ്രദേശ് ഗതാഗത കമ്മീഷണർക്ക് ഔദ്യോഗിക കത്തയച്ചു.
ചെലവ് ഭാരം വർധിച്ചതാണ് കാരണം
കർണാടകയിൽ പഴയ മഞ്ഞ ബോർഡ് വാഹനങ്ങൾക്ക് എഫ്‌സി പുതുക്കണമെങ്കിൽ എഫ്‌സി ഫീസായ 800 രൂപയ്ക്ക് പുറമെ 13,000 മുതൽ 16,000 രൂപ വരെ മുടക്കി ജിപിഎസും പാനിക് ബട്ടണും സ്ഥാപിക്കേണ്ടതുണ്ട്. ഇതിന്റെ വാർഷിക പുതുക്കലിന് 2,200 രൂപ വേറെയും വേണം. ഇങ്ങനെ ആകെ 17,000 മുതൽ 18,000 രൂപ വരെ ചെലവ് വരുമ്പോൾ, ആന്ധ്രാപ്രദേശിൽ വെറും 800 രൂപ നൽകിയാൽ ഇത്തരം ഉപകരണങ്ങൾ ഒന്നുമില്ലാതെ എഫ്‌സി സർട്ടിഫിക്കറ്റ് ലഭിക്കും. ഈ ഭീമമായ തുക ലാഭിക്കാനാണ് വാഹന ഉടമകൾ കർണാടക-ആന്ധ്ര അതിർത്തിയിലുള്ള പെനുകൊണ്ട, ചിറ്റൂർ, അനന്തപൂർ എന്നീ ആർടിഒ ഓഫീസുകളിലേക്ക് ഒഴുകുന്നത്.
വരുമാനത്തിൽ വൻ ഇടിവ്
ആന്ധ്രയിലെ ഈ സൗകര്യം കാരണം കർണാടകയിലെ ആർടിഒ ഓഫീസുകളിൽ എത്തുന്ന മഞ്ഞ ബോർഡ് വാഹനങ്ങളുടെ എണ്ണത്തിൽ വൻ കുറവാണ് രേഖപ്പെടുത്തിയിരിക്കുന്നത്. മുമ്പ് പ്രതിദിനം ശരാശരി 100 ഓളം വാഹനങ്ങൾ എഫ്‌സിക്കായി എത്തിയിരുന്ന സ്ഥാനത്ത് ഇപ്പോൾ 10 മുതൽ 20 വരെ വാഹനങ്ങൾ മാത്രമാണ് വരുന്നത്. ജിപിഎസും പാനിക് ബട്ടണും സ്ഥാപിക്കുന്നത് സ്വകാര്യ ഡ്രൈവർമാർക്ക് സാമ്പത്തികമായി വലിയ ഭാരമുണ്ടാക്കുന്നുണ്ടെന്നും, അതാണ് ഡ്രൈവർമാരെ ആന്ധ്രയിലേക്ക് പോകാൻ പ്രേരിപ്പിക്കുന്നതെന്നും കർണാടക ടൂർസ് ആൻഡ് ട്രാവൽസ് അസോസിയേഷൻ പ്രസിഡന്റ് രാധാകൃഷ്ണ ഹോള ചൂണ്ടിക്കാട്ടി.
നിയമലംഘകർക്കെതിരെ കർശന നടപടി
സംസ്ഥാനത്തുള്ള 6 ലക്ഷത്തോളം മഞ്ഞ ബോർഡ് വാഹനങ്ങളിൽ 3.30 ലക്ഷം വാഹനങ്ങളിൽ ഇതിനകം തന്നെ ജിപിഎസ് ഘടിപ്പിച്ചിട്ടുണ്ടെന്ന് ഗതാഗത വകുപ്പ് അഡീഷണൽ കമ്മീഷണർ സി. മല്ലികാർജുന വ്യക്തമാക്കി. നിയമം മറികടക്കാൻ ആന്ധ്രയെ ആശ്രയിക്കുന്ന പ്രവണത തടയാൻ ആ സംസ്ഥാനത്തെ ഗതാഗത കമ്മീഷണർക്ക് കത്തയച്ചിട്ടുണ്ടെന്നും ജിപിഎസ് സ്ഥാപിക്കാത്ത വാഹന ഉടമകൾക്കെതിരെ കർശന നടപടി സ്വീകരിക്കുമെന്നും അദ്ദേഹം മുന്നറിയിപ്പ് നൽകി. നിലവിൽ പുതിയ വാഹനങ്ങൾ ഷോറൂമിൽ നിന്ന് ഇറങ്ങുമ്പോൾ തന്നെ ഉപകരണങ്ങൾ ഘടിപ്പിക്കുന്നുണ്ട്. കൂടാതെ, ഡ്രൈവർമാരുടെ പ്രശ്നങ്ങൾ പരിഹരിക്കുന്നതിനായി പ്രത്യേക കൺട്രോൾ റൂമും വകുപ്പ് ആരംഭിച്ചിട്ടുണ്ട്. ഇവിടെ ദിവസേന 800 മുതൽ 1000 വരെ കോളുകളാണ് സഹായത്തിനായി എത്തുന്നത്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
